Un messaggio di pace per tutti i popoli lanciato da un grande napoletano: Eduardo.

CI VORREBBE UN PO’ DI PACE OVUNQUE NEL MONDO…

Il collega giornalista Marcello Curzio per il suo augurio di buon Natale, propone la lettura di una vecchia poesia di Eduardo De Filippo inneggiante alla pace, indispensabile per intraprendere qualsiasi azione, composta nel 1948, l’anno in cui l’Italia cominciò la sua ricostruzione dai danni della guerra che l’aveva messa in ginocchio.
Proprio come ancora oggi in Palestina.

Io vulesse truvà pace,
ma na pace senza morte.
Una, mmiez’a tanta porte,
s’arapesse pè campà

S’arapesse ‘na matina,
‘na matina ‘e primavera,
e arrivasse fin’ ‘a sera
senza dì: “nzerràte llà!”

Senza sentere cchiù ‘a ggente
ca te dice: “io faccio. io dico”,
senza sentere l’amico
ca te vene a cunziglià.

Senza senter’ ‘a famiglia
ca te dice: “ma ch’ ‘e fatto?”
senza scennere cchiù a patto
c’ ‘a coscienza e ‘a dignità.

Senza leggere ‘o giurnale,
‘a notizia impressionante,
ch’è nu guaio pe’ tutte quante
e nun tiene che ce fa.

Senza sentere ‘o duttore
ca te spiega a malatia.
‘a ricett’in farmacia.
l’onorario ch’ ‘e ‘a pavà.

Senza sentere stu core
ca te parla ‘e Cuncettina,
Rita, Brigida, Nannina.
Chesta sì. Chell’ata no.

Pecchè, insomma, si vuò pace
e nun sentere cchiù niente,
‘e ‘a sperà ca solamente
vene ‘a morte a te piglià?

Io vulesse truvà pace
ma na pace senza morte.
Una, mmiez’a tanta porte
s’arapesse pè campà!

S’arapesse ‘na matina,
‘na matina ‘e primavera.
E arrivasse fin’ ‘a sera
senza dì: “nzerràte llà”.

Eduardo De Filino, 1948

Da: marcello curzio
[marcellocurzio@gmail.com]